شاعر وأكثر من صورة

أماني

ياليتني قبل أعرف أركض تعلمت أطيح

لاجل اتقي شر عثراتي واعاف الوطا

ياليتني قبل أعرف أتعب عرفت أستريح

عشان ماتوجع دروبي ثقيل الخطا

**

عزة

لو هي عليّه عزيز النفس من صغري

ما أشاور القلب في كرهي لعدواني

إن رحت ياكثرهم وإن جيت ياكثري

ضاقت بي عيونهم لو كنت وحداني

**

صورة

لو ما تثنّى ما دريت الهوى هب

ترفٍ يميّله الغنج والذرابه

تفاح فتنه في محيّاه وعنب

أجوع له واضما ضماه وشرابه

**

طعم

وانا حبيس الصمت سجن الأحاسيس

ضاق الزمان ولا وسعني مكاني

والنور طعمه في عيون المحابيس

مرٍ مثل طعم الكلام بلساني

- سعد الحريص