بقرا عليها السلام!!

من يوم فارقت عيني مادخلها المنام

وهجوس فكري على طاريك سريتها

اسمرعلى ذكرياتك تحت جنح الظلام

واليا لفتني طيوفك قمت ناديتها

عوج المحاني على عد المواصل حيام

ياقو قلبك عليها ليش ما اسقيتها

عطيتك اللي ملكته من غلا واهتمام

ومزون الأشواق في يمناك رشيتها

هملت كثر العطا شحيت حتى الكلام

وامال عمري على لقياك هديتها

لكن مهما حصل ببقى رفيع المقام

نفسي ورى الناس ما والله ذليتها

وش لي بناسٍ على الفرقا تجر الخطام

رجلي على الهون ما والله ضريتها

محبةٍ مثل ذي بقرا عليها السلام

محبة العز فيني عالين بيتها

بموت ما أعلنت في وجه الزمان انهزام

حتى لو الحال هذي ما تمنيتها

بعاند الوقت وأصبر والنظر للامام

وهموم وقتي عن الشمّات طميتها

لاضاق صدري من الدنيا وكثر الملام

عن المدينة وصوت الناس سجيتها

- فهد الروقي