الرعد والبرق

لا تعتذر ما عاد للعذر قيمه

كثر الخطا ياشينها فيه الاعذار

جرحك عميق وذكرياتك أليمه

ذقت الاسى من حرها امرار وامرار

يوم انها بالطيب وانا الكريمه

مدّيت جزلات العطايا بالاخيار

ما أرضى الخطا! ولارضيت الهزيمه

طبعٍ ورثته من طويلين الاشبار

اسمع جديد الهرج واترك قديمه

ما لي بترديد الحكايا والاخبار

تشوم نفسي ما نقلت العقيمه

ولا جيت انبّش عن محابيس الاسرار

بين العرب واهل الفعول العظيمه

من فضل ربي لي معزه ومقدار

واليوم ماني في حياتك غريمه

رزقٍ مقسّم حلّقت فيه الاطيار

رح ما بقالك وسط عيني حشيمه

اللي بنيته من سبايبك منهار

الليل يشكي ظلمته مع عتيمه

والصبح لاشرق عمّت الكون الانوار

والشمس ما تحجب سناها بغيمه

وعقب الرعد والبرق! همّال الامطار

- الشاعرة: بروق بدوية