يالله ياللي بشانك ماتشاور خبير
يالمستقل بملكوتك بدون اخشرى
يالواحد الفرد يالرب العلي الكبير
انت المهيمن نهار العرض والمحشرى
يالقادر اللي نلوذ بوجهك ونستجير
ونعوذ بك من مقام الذل والا الزرى
يالله بنوا من المنشا يشوق النظير
يعم شبه الجزيرة مدنها والقرى
لا اقبل تقول ان في جوفه شهيق وزفير
يهل وبل الرضى بالليل برقه سرى
ديمومة سبلت من فجر لين الأخير
سيوف هند تسل وراعد زمجرى
من مد لهم طفافيحه مطرها غزير
يخطف سنا برقها ابصار وعيون ترى
واليا انجلت ظلمة الدنيا بصبح منير
وانطر نور الصباح وطار عنك الكرى
تشوف بحرٍ تلاطم بين شعب وغدير
وسالت رياض وفياض وكل وادي جرى
عشرين يوم ويديم القاع يلبس حرير
جرد الفيافي كساها ثوبها الاخضرا
لا هبت النود جا للمسك نوج وعبير
ريح الخزامى يعج ويبهج الخطرا
من كل لون من الأزهار فكرك يحير
وش ماربيا ووش برلين وانجلترا
تسمع غواني طيور وللبلابل صفير
والشعر جاله مجال لشاعر الندرا
هاذي بلادي حباها الله بخير كثير
جبريل فيها نزل بالحق داخل حرا
على الرسول الامين اللي لقومه نذير
محمد المصطفى المختار خير الورى
يا موطن العز ماللمجد غيرك خشير
يا مهبط الوحي في طيبة وبام القرى
بقيادة اللي على العدوان سيفه شطير
خادم بيوت العظيم الحاكم الخيرا
عبدالله العادل المقدام غيث الفقير
الصادق اللي كما بدر الدجى النيرا
محبوب للشعب كله من كبير وصغير
احتل كل القلوب بطيبه مقدرا
ولي عهد البطولة ليث غاب شهير
وزير عام الدفاع وقايد أسد الشرى
حرٍ نداوي يداوي كل جرح خطير
وقدره تعدا الثريا عن مقر الثرى
تاريخ سلمان حافل للبطولات أمير
ومدات كفه جرت منه أوديه وأنهرا
ونايب ولي العهد مقرن نقي الضمير
له بالمكارم مواثيق وعهود وعرى
وربان بحر السياسة عاش نعم الوزير
سعود بن فيصل اللي بالدها قيصرا
وبالداخلية محمد بالقيادة جدير
هذا ولد نايف اللي للجزيرة ذرى
وأما حرسنا ليا جا الحرب له فعل غير
كتايبه قادها اللي بالوغى عنترا
والله يجنب بلدنا شر نار وسعير
ويدوم عز الوطن شعب وملك ووامرا
- باني بن عبدالله البقمي
