يا وطنّا ابشر بعزّك على الملّه

حاكمك سلمان والشرع دستوره

من زبن للملكه عاش في ظلّه

لا انتخى هز البشر فعل اخو نوره

من نوانا قبل يوصل بنوصلّه

قبل لا يمشي ندكّه وطابوره

من بدأ بالشر جاه الغضب كلّه

لين تدفن هامته في طرف سوره

يا صقور الجو ودعتكم لله

راية التوحيد بالحق منصوره

ما تعودّتوا على الذل والذلّه

ثوّروا في راس من يدّعي الثوره

جارنا ما هو على الكيف يحتلّه

والله إن يموت ما غيّر الصوره

ذي عوايدنا ولا نقبل الزلّه

من طمع في جارنا ينتهي دوره

لا فزعنا نفرق الخل عن خلّه

لين ترجع زمرة الظلم مدحوره

جيشنا لامن فزع وصل في حلّه

قاده رجالٍ على الموت مسروره

شاربين الموت مع شربة الدلّه

كل منهم لا انتخى يفقد شعوره

السعودي وان كسب مدح كفوٍ له

ماخذه من فعل يمناه وجذوره

- الشاعر/ عبيد الأزمع أبو ثنين