يا بو فهد ما خاب جارك ولا هان..

يا مزبِّن المضيوم داحر اطماعه

يوم اعتزى هادي بخوه وجيران..

حنا لها ما خاب هادي بقاعه

تعصف رياح الحزم وتقود فرسان..

ولبت رجال الحرب يوم اندلاعه

هدت صقور الجو من يد سلمان..

هدت شجاعٍ ضاري ٍ للشجاعه

تشلع سما وليا دوت فعلها بان..

دكت اعدانا واشعلتها بساعه

ومقرن ولي العهد ياطير حوران..

نعم العضيد اللي بشوره قناعه

وهذا ولد نايف محمد كحيلان..

شبل الاسد نسكن بقلبه وداعه

والفارس اللي امتطى صهوة حصان..

حصان السياسه معتليه ابراعه

حنا بجيش الحق نلجم به ايران..

ونلوي ذراع اللي نوت بالقطاعه

نارد لهم قوه وحكمه وشجعان..

ما تسكن قلوب الشجاعة جزاعه

عدونا ما يهتني بكل الأوطان..

نشهر له سيوفٍ وفت في ضياعه

حريبنا خسران في كل ميدان..

تزحف له جيوشٍ ضرت للمناعه

ياسيدي هذا الوطن دار الإيمان..

نحمي ديار العز سمعٍ وطاعه

- صالح محمد الدويان