الموضوعات الأكثر
النفس طابت واستعدّت للرحيل
أمسح عناويني وروحي خلّها
فرقاك عيد ولا تظنه مستحيل
واللِّي عقد روس الحبال يحلها
أبعد بعيد هناك لو دمعك يسيل
ما همني، لو الدموع اتهلّها
أنا عزيز النفس... ماني بالذليل
ماني مثل غيري حياته ذلّها
أنا الجدي وسهيل والسيف الصقيل
والأشرعة مركب شموخي فلّها
بُعدك دواء ومواصلك جمرٍ كليل
وطاريك، يقتل فرحتي ويعلّها
وقتي معك ضايع بلا فود وحصيل
أنسى الغصون اللّي تفيّا ظلّها
يكفي كفى قلبي من أسبابك عليل
مشاعري، ماكنت أبد تفطن لها
أقفت ضعوني عن صحاريّك تشيل
ظمأ السنين الممحلة واتلّها
روحي تظنّك يا سراب السلسبيل
يالله عسى غر المزون اتبلّها
لا تاخذ وتعطي معي شف لك بديل
من مثلك لروحي ما هو بكفوٍ لها
أنا على وضح النقاء وأكبر دليل
وثقت بك وأنت السيوف اتسلّها
لا لا تبرر لي أو تحاول تطيل
معي سواليفك خفوقي ملّها
كنت السراج لِـ ليلك وقلبي فتيل
إنور لك دروبك عشان اتدلّها
واضح وضوح الشمس والموقف أصيل
أفوّح دلال الوفاء وازلّها
واللِّي مثل شرواك ناكر للجميل
يا للأسف.. نسى المواقف كلّها
رح في طريقك ما بقى عمرٍ طويل
واللي عقد روس الحبال يحلّها
- الشاعر/ نايف العبيد