الموضوعات الأكثر
سمّيت بك يا من تمسّكت بسماك
يا من له العبد التقي ساجدٍ له
يا للي ليا ضاقت على العبد ينخاك
وان ما رحمته ماحدٍ فازعٍ له
عسى هل العادات والجود بحماك
كل أجودين تابعٍ عادةٍ له
عوايد الأجناب ما هيب تخفاك
سلم الجدود وارثه مستحله
ترى طويل الهرج وان طال عنّاك
كلٍ قدايم والده يشهدٍ له
والناس كلٍ دون عانيه سرداك
كلٍ كسب من سمعته ما حصل له
عنابر الأجواد ذربين الاسلاك
ما شفت من قولٍ جميلٍ تحله
كان الزمان بمشكلاته تحدّاك
عنّز لمن فك الحسب ضاريٍ له
خص السدارى قومٍ ادناك بادناك
رجالهم يشفيك عن كل علّه
ليا من واحدهم تكلّم بدعواك
ترى كثيرات، الأمور يهفن له
هم ماكرٍ طيره ليا هد عشّاك
روس الجبال النايفه ماكرٍ له
ياللي خذيت من التعابير فتواك
دربٍ يدلّونه هل العرف دلّه
اسمع تعابيرٍ هدفها تمثناك
به مصدرٍ شرحه على طيب حلّه
يا بن السديري شرفتنا وصاياك
خطب كبيرات القلوب اسطبن له
شفنا ختامك يا محمد ومبداك
وازتني العبرات يوم استهله
يا مير ظلمانا تسفّر بقمراك
من كان نورك يشمله مسفرٍ له
بغيت في رد المثايل مواساك
مير القمر ما ينتسب للأهلّه
ان كان أنا بالرد عندك تمسّاك
ابن السديري ما براسي نزل له
الموجب إنّا بالتواضع شكرناك
وان الوفي فعل التواضع وفا له
شكرت معروفك وانا مقدر اجزاك
ما قدر جزاك ولا بعد قادرٍ له
جزاك من عندي بياضٍ تغشّاك
هذا جزا من لا قدرنا جزاً له
يا لصاحب اللِّي كل الاوصاف تزهاك
فعل الوفا هو والذكا لايقٍ له
الصاحب اللّي سمعته ما بها أشكاك
لي الشرف وإن كنت أنا صاحبٍ له
أنا صحيبي مثل أبوزيد وهناك
اللي شريفات الطبايع هوى له
لو نتّبع صفحات مجدك لقيناك
زين لمن صعب الأمور التون له
يا محمد الأحمد ترى أصغر سواياك
مثل الحبيل اللّي تراك افرجٍ له
خلَّصت مشكلته بمالك ويمناك
محيت عنه الدم والجرم كله
والتاليه شف ما ترى لا عدمناك
امرك تمثّلني وأنا طايعٍ له
ما فات يومٍ خاطري ما تمنَّاك
مثل الغريب اللِّي تجنّا هلٍ له
حنّا نباشر بالدواوين طرياك
طاريك يا فرز الوغى ما نملّه
طال الزمان ولا توالمت ويّاك
مضيت كل العمر بخذه وخلّه
لا بد من يومٍ على خير ننصاك
متى ظروف المنتدى يسمحٍ له
خص الرفيق اللي يخصّك وياراك
حقٍ عليك زيارته في محلّه
يا عز منهو ساعة الضيق ينخاك
ليا من كلٍ طب لعيون خلّه
جتنا مكاتيبك وجتنا هداياك
مثلك تراني بالوفا شاكرٍ له
واليا حضر عندك مجالي سمعناك
في جانبي عن كل عم يخلّه
هذا تواضع منك من طيب مجناك
من رابع الطيِّب نزل منزلٍ له
- الشاعر/ مرشد البذال -رحمه الله-