الموضوعات الأكثر
لو الهروج العوج تاقف على الزور
احسن ما تطلع والعرب تنتقدها
تهدم بيوت العز وتضيق صدور
ويلحق ضررها نفس من هو قصدها
واللي هرج بي كلمته كلها زور
كلمة حسد والخلق ما كثر حسدها
قبرتها بالصدر مع عدة قبور
اجنازةً حطت بداخل لحدها
ماني مطردها ولاني امجبور
اركض وراها لين احصل سندها
تبعث بيوم البعث وتلاقي النور
ويحكم بها اللي فوق عرشه شهدها
والناس تفهم عمي الأخبار والعور
ومن هو تعب لاجل الحقيقه وجدها
تاخذ وتعطي والخبل دوم مثبور
وصحاح العلوم ان باينت تعتمدها
خل الغشيم يقول ويكمل الدور
طاقة حكي عنده ما يحصى عددها
ثوبه على النمه اليا جاك مزرور
والناس ضاقت من علومً سردها
ما حدا يقول اجلس ترى البال مسرور
كلا يبي فرقاه وأمر وادها
وأنا اتعذر عن قباله ومعذور
ونفسي على الجزله ماونا جهدها
اسري مساري ذيب لدنع الثور
وانقى علوم الصدق واترك زبدها
ويفعل سواتي بالزمن كل ممرور
حبل الضلايم رخو لو طال امدها
نمشي بثر قوماً لنا تحكم الشور
رست على اقمام العلالي وتدها
نجلس مجالس طيب ونخاوي صقور
وحقوق العرب لا شك ما نضطهدها
وهاذي سلوم الناس في كل العّصور
قواعدا رست وثابت عمدها
وإلا الردى دربه من الناس مهجور
قطعت طحالب فيه ماحدا حمدها
ولو الرجال تغيب عن داخل الدْور
تبقى قصصها عبرةً من بعدها
ولو الرخوم تحط في داخل السور
ياعنك لو غابت فلا احداً فقدها!!
- ممدوح البدراني