يا هبوب الريح هبّي عليّه من شمال
برّدي همٍ بقلبي من العام ايغلي
كل ما منّي تمعّنت في سود الليال
قام صدري من سببها يفيض ويمتلي
لا ذكرت الماضي اللّي مثل وصف الخيال
كن في صدري مشاهيب نارٍ تصطلي
يوم أفكّر واتذكّر صناديد الرجال
ما بقى منهم على الأرض حيٍّ يا علي
ما بقى إلاَّ ذكرهم كل ما جاله مجال
هلت الدمعه من العين دمعٍ يهملي
كنّهم ما دوّجوا في السهول وفي الجبال
يالله ارحمهم برحمتك يالله يا ولي
يالله المعبود وياللِّي عليك الإتكال
اغفر ذنوبي وفي القبر وسِّع منزلي
طالبك يا رب وفّقني أجوبة السؤال
لا حظر منكر ونكير وانكفو هلي
اقفوا الاصحاب والمال عنِّي والعيال
ما بقى في وشحة القبر يا كود اعملي
يالله ارحمني برحمتك يا منشي الخيال
يا اله الواحد اللِّي علينا معتلي
وعطني من عندك يا ربي من الرزق الحلال
ولا تواخذني يا ربي بظلمي وجهلي
السنين تدور والعمر يفنى لا محال
علم اللي غافل الموت يمه مقبلي
- الشاعر/ سهل بندر بن حياد المقاطي