الموضوعات الأكثر
الا يالله ياللي فوق عرشك والخلايق تحت
تشوف ولا تشاف وتعلم المكشوف والخافي
ولا يصلح على الدنيا سوى اللي يالعظيم اصلحت
بيدك اجال وارزاق العباد ونورك الصافي
ودودٍ تنزل الرحمة عن الزلات كم سامحت
نعوذ ونستجير بقدرتك قدام الاطيافي
وانا من يوم توي بالكلام اليعربي افصحت
مصخر في رضى رب الملا قافي وميقافي
بك امنت وعليك المتكل ولهيبتك سبحت
كبير من يلوذ بقدرتك ما صابه خلافي
على تدبيرك وعلمك معي من وين جيت ورحت
تعلق فيك مملوك ملكته بامرك الوافي
والايالله تجعلني مع اصحاب الفلاح افلحت
لو اني عبدك اللي بالخطايا مسرف اسرافي
وانا البارح مع احداث التجارب ساهر ما ارتحت
فراشي من غرابيل الدهر وهمومي الحافي
مخاوي للسهر لين السحر نادى وقال اصبحت
يجافي جنبي المضجع وغيري بالدجى غافي
عليك الله وامانه ياعنا ..كم للقلوب اجتحت
كما اجتاحت جيوش الطامعين بلاد واريافي
وانا لو كان همي كالجبال الشاهقة ما بحت
سوى للواحد اللي للبشر رحمن روافي
عجايب يا زمن كم عين تبكي كم عيون افرحت
ليا منك ضحكت بنابك الوضاح يا كافي
على جور الزمان اللي نحت عوج الحنايا نحت
صبرنا ثم شكرنا ثم ذكرنا الوالي الشافي
والا يالله بالمد الحلال ولا طلبت السحت
عزيز النفس عونك يرتجي من جودك الضافي
وانا في حاجتي لك دون غيرك يالولي صرحت
ومن مولاه عونه عاش بين الناس متعافي
- باني بن عبد الله البقمي