بنلتقي لو الزمن يحكم علينا بالبعاد
لو الظروف الجايرة جتنا بعكس اللي نريد
يومٍ يجيبك يالغلا كنه من أيام العياد
في ذمتي أنه يشابه عندي العيد السعيد
ابكحل عيوني بشوفك عقب ما اقزاها السهاد
واروي عروقٍ دمها نشفان في وسط الوريد
وآبخذك في حضني اللي ذابحه طول البعاد
وان قلت لي يكفي كذا أقول هل عندك مزيد
يا صاحبي دنياي بعدك ما بها غير السواد
عجزت لا أنسى وأنت عني يانظر عيني بعيد
ما لي ونيس إلا الشعر والحزن دايم فازدياد
وراس مالي ذكرياتٍ معك يالدر الفريد
اليا ابتدى يومي بدت في قلبي جروحٍ جداد
واصبر وأقول إن اللقا لا بد يأتي من جديد
ولا غابت الشمس وعباد الله راحوا للرقاد
سرى بي الهاجوس يمك يا بعد كل القصيد
هذا الخيال وما يجي به لابتدى ليل الهجاد
اجلس معك لين الصباح يبان نوره للعبيد
وأصبح على هم وأسى وجروح ما تلقى الضماد
وآهات من حكم الزمان وطيحة الحظ العنيد
لكن أنا عندي أمل لو كنت في أقصى البلاد
لا بد يوم ونلتقي والله يفعل ما يريد
- متعب العتيبي