الموضوعات الأكثر
عسى الغمام اللي خياله مضاليل
يضفي على كل المناطق والأصقاع
عسى الديار القاحلة يدهجه سيل
يروي ثرى البيدا سماهيد وتلاع
غر المزون اللي تصب الشهاليل
من غيث ديم اليا نزل يسقي القاع
ينزل على دار القروم المشاكيل
عزوة هل العوجاء صناديد واسباع
اللي يمانيهم مثل فايض النيل
ريف الضعيف وللمقلّين مرباع
حكامنا نسل الملوك العواهيل
اللي لهم في قمّة المجد مطلاع
صفوة مواريث الرجال الحلاحيل
العزوه اللي بالفخر علمهم شاع
تاريخ مبطي له شهود ودواليل
تاريخهم عند البشر يملأ الأسماع
يروون حد المرهفات المصاقيل
سيف العدل بكفوفكم يبري الأوجاع
عوق العصاه أهل القلوب المغاليل
وضد الذي بالنصح يرشد ولا طاع
أنتم حماة الدين عن كل تضليل
ينصركم اللي للسّموات رفاع
ذللتم اللي ينقض العهد تذليل
عقب العيا لابد للحق ينصاع
من حاد عن درب الهدى فاله الويل
من دون قصد مدوّر الشر مناع
ومن خان يستاهل مهونه وتنكيل
سيف العدل لرقاب الأخصام قطّاع
أنتم كعام الصايعين المهابيل
بقيادة اللي للعدى يوفي الصاع
سلمان عاهلنا زعيم الرجاجيل
أبو فهد من تاه دله بالأسناع
ضد الحقود اللي يبث الأباطيل
كل البشر ضدّه تصوّت بالأجماع
جزم وصمم ما تفيد العواذيل
وكلّف صقور الجو والناس هجّاع
ترمي على راس المعادي زلازيل
يسوقها من عاصف الريح ذعذاع
من لاذ في سلمان يشكي من الميل
يقضي على الطاغي وللجار فزّاع
نسل الزعيم اللي تفضل على الجيل
من عقب ما كانوا محاويج وجياع
شعب الجزيرة بالسنين المساميل
شمله شتات وبينهم حرب وصراع
جاهد ووحدها على الهجن والخيل
فوق النضا باج الفيافي والأرياع
يسري ويجري في نهاره مع الليل
حتّى توصّل للهدف طايل الباع
عبدالعزيز أبين من البدر وسهيل
ساطي ويخشى سطوته كل طمّاع
وأنجب ملوك لمن نصاهم مداهيل
ابوابهم لشعوبهم دوم شرّاع
يقضون باللي جاء من الرّب تنزيل
ما قلدوا حكم الملاحد والأشياع
هم عزنا والله عليه التواكيل
حكم العدالة حافظ الحق ما ضاع
لي الفخر أمدح هل الفضل بالقيل
أفخر بهم ماني محابي وخدّاع
وصلو على اللي جاه بالحق جبريل
وأهدى بهديه ساير الناس بقناع
- عبدالله بن دهيمش بن عبار العنزي