لشر بيبانه وللخير بيبان

وللصبر ترويحه وللصدر ونّه

واللي قضاها بين ذكرٍ وقرآن

الله من ضيق المواقف يحنه

شتّان ما بين المخاليق شتّان

وكلٍ على ظنه يبا يشوف ظنّه

القاف يطرب والترنّم بالألحان

يليق بالمنشد ليا قلت غنّه

لو كان صدري من غثا الوقت مليان

بغض عنه الطرف واصد عنّه

واقول من صادق احاسيس ولسان

هذا الشهر خسران من ضاع منّه

شهر التراحم والهدى شهر الإيمان

الصوم ريحانه.. والإيمان بنّه

يا طالب الإحسان في شهر الإحسان

اقبل ترى ربك عطاياه جنّه

اقبل ما دام العمر إلى الآن

لا تكبح حصانك.. وللخير عنّه

ابذل لآخرتك وتبشر بغفران

لاصرت مخلص والعطا ما تمنّه

ساهم في وقف الخير والرب رحمان

ابذل ترى ربك عطاياه جنّه

- جزاء البقمي