الموضوعات الأكثر
إرجع الى أهل العلم لاحتجت تفسير
ينبيك بالفتوى شيوخ وكوادر
الدين منجا للمخاليق ومجير
مثل البواخر لارست بالبنادر
والهرج ينقى من بعد طول تفكير
مثل الحصيل اليا صفا بالبيادر
ودامه يطولك من مخاويك تأثير
فاحذر ترى المجدور لابد جادر
خلك جليس القرم واف الاشابير
الصالح اللي من مجانيه نادر
قرم ٍ على العليا يسابق كما الطير
ودايم على نفعة صحيبه يبادر
وترى الكريم معان في غير تبذير
ولو قالوا العذال للمال هادر
الجود ميزه للرجال المناعير
ما جنبوها لو تشح المصادر
واحذر من اللي شاطرٍ بالمعايير
وهرج السعه مع رشفة الشاي خادر
من زمرته غطى على سالم الزير
يذبح ويصلخ كنه الهرش هادر
ولا حلت الفزعه سريع المعاذير
يقول ما اقدرها ولو كان قادر
وخلك من الواشي كثير المحاذير
ان غادرك والا عن العفن غادر
اللي لسانه مثل وصف المناشير
والغ بعرض الناس وارد وصادر
يطرب ليا شاف الاوادم شعاثير
ويغتاض من لمة جبال الحنادر
ان راح مستقبل فحدر على خير
واستقبل القبله ليا صار حادر
ودك على شكله تدوس البساطير
ذا منزله بين الوطى والكنادر
تكرم عن العجفا سموع المسافير
لاشك ذي وصفة دوا كل غادر
- فيصل بن محمد العطيشان