لا تغرك الدنيا ، وتركض وراها

الصوت ماينفع اذا فاتك الفوت

أمّارةٍ بالسوء نفسك تراها

من طاعها يندم إذا جاله الموت

واعرف ترى أمك صعب تلحق جزاها

من برّها يبقى سعيدٍ ومبخوت

اذا رضت ربك رضى من رضاها

وجازاك بالجنة جواهر وياقوت

تذْكرك دايم ياولد في دعاها

وأبوك أبوك بحضرته خفّض الصوت

كم سكة للرزق لجلك مشاها

كل همه يوّفر لك الرزق والقوت

اغرس نخيل الخير تجني نماها

من يزرع الاشواك مايلقط التوت

وصادق رجال الدين واتْبع خطاها

حاشاك يندم من عرف كل سربوت

واصبر على الاقراب وادمح خطاها

لا تصير بيدين المضلين ريموت

اكتم همومك لا تبيّن خفاها

وقابل كلام الجاهل بصمت وسكوت

ومن يقصدونك لا تقصّر معاها

المرجلة ماهي بسكبات وبشوت

مد نظرتك للعز وابعد مداها

وارسم طموحاتك عمارات وبيوت

الحر يشهر والمعالي رقاها

محمود والا البوم بالشين ممقوت

ذى قول من جزل المعاني بناها

واذا الشعر بحرٍ فهُو داخله حوت

- نايف العبيد