من لا يرافق واحدٍ مثل ابن عون

والله ليبطي ما تحقق مرامه

على فعول الطيب مغرم ومفتون

يا سعد من صار أبونايف حزامه

يصرف على المحتاج ويسدد ديون

الله جمع فيه الكرم والشهامه

لو يدخل حسابه ثلاثين مليون

راحت هدايا للضيوف وكرامه

ولو يملك أموالٍ مثل مال قارون

على أهل الحاجات يصرف نظامه

يفرح به اللي من ورا الباب مسجون

من كبر حمله ما تشيله عظامه

ياقف معه بالجاه وابليس ملعون

حتى يحقّق له طريق السلامه

والله مدري يا عرب وش تقولون

بس الوكاد الطيب ماسك اخطامه

له سمعةٍ غطّت على معظم الكون

شعر النبط متربعٍ في سنامه

شاعر علم شعره عن العيب مصيون

يفرض على كل الجميع احترامه

ينحت صخر يوم ان غيره يجيبون

من فيضه الوادي وجنب العدامه

شعره ذهب واحد وعشرين مضمون

عليه توقيعه وبصمة ابهامه

كل القنوص من الصحاري يصيدون

لكن بعض الناس صيده اهلامه

سحر البيان اللي مقفّى وموزون

إذا تكلم تاجده في كلامه

يالله يا معبود يا مدبر الكون

تطول حياه اللي رفيعن مقامه

- سهل بندر المقاطي