الليل طرف وخاويت المسا للصباح

والشمس مثل الهنوف ليا ارتفع شالها

والحلم ودع جفون النوم والنوم راح

واحلى المواعيد خلتني على بالها

ما قدمها الا المحبة والشعور القراح

بغيابها ما ذخرته كود لوصالها

ما يمدي الشوق في صدري يفل الجناح

للفرحة اللي طلوع الفجر يغتالها

لو قلت يا طيبي البارح عرفت المراح

البنت ما تترك البارح على فالها

ان ساقها الود يمي كل براق لاح

لو ما تهادى مطرها جيت بظلالها

تستاهل الحب والغيرة وكل الجراح

اللي ذبحها الهيام وهي على حالها

حوريةٍٍ لا رتع فيها النظر واستراح

هيجنت لاشواقي العطشى على جالها

حنت ضلوعي ولج الضلع الاقصى وصاح

ان بينت بدرها الوضاح وهلالها

ماغابت الشمس عن جيد الذهب يافلاح

النور ما فارق السبحة وسلسالها

ومجدلٍ طيحته وحدة ليا طاح طاح

ان طاح في غفلة منها ثنى حالها

هداجة الحسن راعية القوام الشناح

ابطيت اغني بها شعري ولا طالها

ان شفتها قلت وش علم القصايد شحاح

ماهيب هذي قصايدها ومن قالها

ان كان ما قلت فيها ورد شعري وفاح

لعلها ما تخليني على بالها

- ضيدان المريخي