شفت كثر النجوم وأعجبتني

ليلة البر والأرض النديّة

يابن أمي تراها هيضتني

للشعر واللحون السامريّة

كنها بالقصايد ساجلتني

واركبتني خيول السرمديّة

درت كل المجرة وارجعتني

والخيال لفِكِر مثلي هديّة

شفت فيه النيازك ودعتني

باخر الليل وتسلم عليّه

النجوم السواهر سامرتني

ليلةٍ من لياليها الخليّة

يوم بدر الدجى شَعّ اتركتني

ساهرة بين ذاك وبين ذيّه

بين أمٍ بالاخلاق اجذبتني

والأخو يحفظه رب البرية

جالسة والخيالات احملتني

للمجرات ونجومٍ قصيّة

قمت اغني لها يوم اطربتني

(طَوّل البُعد يا الغالي عليّه)

بدرالبدور - القصيم