جاني خبر ما تحمّلته ولو هو شيء مسنون

لله أنا قلبي اللي كل صدماته عظيمه

ما دبّر الله رضينا به يجي من عامر الكون

ما فيه بيعً ولا به مشترى ولا ظليمه

عزون في صاحبي ياهل الوفا عزّون عزون

بالصاحب الوافي اللي صحبته عندي قديمه

صحبة وفا وافية ماهيب في دون على دون

تسع وثلاثين عامٍ والصداقه مستقيمه

أروح يمّه وأشوفه ما يكفّين التلفون

وهو يجي لي يشوفن ما يقول الرجل نيمه

مرحوم ياحمد عساك بجنة الفردوس مضمون

في جيرةٍ مع سميّك والصحابة في نعيمه

مرحوم يا شاعر المعنى إلى جا العلم مدفون

له حجةٍ في طرف كمّه وفي مِحزم بريمه

كم واحدٍ جا يهوم مراوزه ويعود مغبون

إما تسنع معه وإلا يسرّيه الخريمة

يستاهل الخير راح بخير وأهل الخير يدعون

له سيرةٍ طيبة يلقاه قدامه غنيمه

- صالح بن محمد العميم