الموضوعات الأكثر
شاعر يدور شهرته يوم يرثيك
وشاعر يدور دافع ن للقصيده
وانا من البارح يبوفيصل ابكيك
وافل تذكار القصائد واعيده
انت الذي علمتني من مباديك
وانت الذي شعر الحداثة جديده
المختلف ما اعرفه لولا قوافيك
ولولا قصيدك ما شريت الجريدة
اتابعك من صغر سني واسميك
رمز الأدب والمفردات المجيدة
بدايتي بالشعر متاثرن فيك
ويا كثر من حبك سكن في وريده
بنيت لك بالمجد قصرن بياديك
ويبقى فخر فيصل ويبقى رصيده
رقيت للعلياء وهذي تكفيك
واكبر دليل جنازتك من شهيدة
جموع من كل القبائل حواليك
ورموز حضرت من ديارا بعيده
والا القصائد كلها ما توفيك
انا اشهدنك يا مساعد فقيده
- محمد منور الجريشي
* *
ضاق الغمام وهب للحزن نسناس
من بعد ما خذت العلوم الوكيده
مرحوم يالي سمعته ترفع الراس
يالي صحيبه بالمواقف عضيده
خيم خميس الحزن بالهم والياس
من بعد ممات الزعيم الفقيده
شاعر وله في قمه المجد مجلاس
انا اشهد انه بالمواقف وليده
يالله يالمعبود يخالق الناس
يالواحد اللي كل شي تجيده
ترحم مساعد يوم الارياق يباس
وعساه في خضر الجنان السعيده
- خالد سالم الخياري
* *
العلم ياصل مع وصول المناديب
وصدّق عليها بالتواصل خبرها
والوقت كشّر في نيابه كما الذيب
والعين حر الدمع حار بنظرها
علمٍ بدا ما فيه شك ولاريب
قامت تواتر بالتواصل صورها
ضاق الفضاء وضاقت عليه المحاديب
لين استحارت بالمحاجر عبرها
مرحوم يا عودٍ عريب المناسيب
أحمد ولد ناصر علمها بحرها
حرٍ تعلى فوق رووس المراقيب
مبدع طروقه في زمانه شهرها
له سيرةٍ فيها تحير التجاريب
وبحورها ينثر عليها دررها
جزل المعاني والصور والتراكيب
يفتل وينقض والقوافي صخرها
من طلعته ليما غزا راسه الشيب
يرقى سما ما يلتفت في وعرها
الصارم النادر عطيب المضاريب
لامن وقف بالملعبة بان اثرها
له هيبةٍ فيها سياسة وأساليب
راع العلوم الوافية ما اختصرها
مبعد شبوحه عن هوى العَي والعيب
واليا كسب له مفخره ما خسرها
عزيز نفس اموشّحه سترها طيب
واليا بدا له حاجةٍ ما سبرها
حكيم راي وقالته بالمواجيب
يمسي كلامه بالليالي قمرها
لامن زعج صوته طوال الأشانيب
قامت تحاذف بالمحافل اغترها
تشهد له الساحة حصان الأطاليب
حكيمها ميزانها هو فخرها
وشهود ربي ما ترهى على الغيب
والناس تعرف خيرها من قشرها
ويالله يا جابر قلوب المعاطيب
تجبر عزا عياله وآله واسرها
وتجبر عزانا فالليال المحاديب
وتستر علينا من صوادف دهرها
هاذي المنايا كل يومٍ كلاليب
قامت تناشب والخلايق باثرها
عساه بالجنة بحلو المشاريب
بانهارها بأشجارها في ثمرها
بجنات عدنٍ حورها والكواعيب
وباخلاقه المثلى عطاها مهرها
وصلوا على المختار بالجهر والغيب
عدت حجيج البيت واللي اعتمرها
- جارالله الغزي
* *
ابداء بذكر اللي خلقنا عبيده
الواحد المعبود رب الانامي
اللي يدبرنا على ما يريده
بأمره تبين الشمس عقب الظلامي
علمٍ لفاني ليت ما جاء بريده
منه وقفت ولا نقلني عظامي
مصيبةٍ تلت بقلبي وريده
والله ان فراق أحمد صرمني صرامي
راح الفقيد اللي يسمى فقيده
راح الزعيم اللي عليه الكلامي
اقفى فريد الشعر واقفى عميده
عقبه نقول اقروا عليه السلامي
له بالملاعب وقفة ابن الوليده
برد العدود ومروي كل ضامي
غاص البحور وجاب منها الفريده
رسالته حازت على أعلى وسامي
دايم شبوحه بالمعاني بعيده
ذا من كلام ابو جميل الزلامي
جزل المعاني له صفات عديده
وافي ومتواضع عزيز المقامي
يا جعل روحه تنكتب له شهيده
ويا جعل قبره روضةٍ ما يضامي
طالبك يا محيا العظام الرميده
تغفر لعبدك عقب مر السقامي
ويالله طلبتك جعل عفوك رصيده
ويالله عسى الفردوس مسك الختامي
صلوا على اللي له خصالٍ حميده
بعداد من طاف الحرم بالحرامي
- خالد بن عبدالمحسن الناصر المقحم
* *
الشعر يبكي من حزن والقاف عبرات وحنين
وروح الأدب لأهل الأدب مدت يدينٍ حانيه
يا سيف بادت مدتك ما عاد به جنبٍ متين
إن كان أبو فيصل رحل ما فيه مدة ثانيه
حمّلت فقده غيمةٍ تمطر على مر السنين
تشخص بها أنظارنا طول السنين الفانيه
سيف العشق فخر الوطن أزكى كلام الأولين
اللي تطاول قمته هيبه صدورٍ شانيه
يا مساعد أصبر وأخذنا لسان حال المعجبين
واللي معك من حقبتك عاشو ليالي هانيه
إن كان أبو فيصل رحل نايف صقر أقبل حزين
ومن الوفاء أسقى فهد عافت قطوف دانيه
تخلخلي يا عبرتي وأخذني شعور التايهين
اللي خنقت رغباتهم لحظة وداعٍ جانيه
صدري مدار لعبرتي والدمع عفواً ما يبين
لأنه فخر كل الوطن برجٍ يشرف بانيه
- فيصل محمد الدلبحي
* *
مرحوم يا رأس الشعر والحميّا
عز الله إنه راح منّا فقيده
ليت القدر عن هامة الشعر عيّا
مرحوم ياراع الخصال الحميده
موتك كوى خافق محبيك كيّا
وولّع على وزن القوافي وقيده
عساك بالفردوس الأعلى تفيّا
رحماك بمساعد ياراحم عبيده
- سعد فايز مربح الرشيدي
* *
علم لفا هوله يذوب قوي الحديد
تغريدة بتوتر والناس يقرونها
أحمد توفي وصار العلم علمٍ أكيد
والعين هلت من الدمعات مخزونها
ومات من عقب عمرٍ بالمراجل مديد
والنفس باحت عقب فرقاه مكنونها
تبكي عليه الملاعب مع جزال القصيد
خبير شعر الملاعب صاحب فنونها
أمير شعارها.. ماسك رسنها.. العميد
العالم بسرها واستاذ قانونها
الفاتل الناقض الضلع القوي الفريد
له هيبةٍ بالملاعب صان مضمونها
تبكي عليه المبادي من قديم وجديد
وتبكي عليه الرجال اللي يعرفونها
ويبكي عليه القريب وصاحبه والبعيد
وارضٍ مضى فوقها وارضٍ وقف دونها
الشاعر الفحل والرجل السداد الرشيد
اللي علومه هل التاريخ يروونها
مضرب مثل بالتواضع والكلام المفيد
هو من عيون الرجال إن عدت عيونها
يا خال.. يا عم. ابريثيك بجزال النشيد
لو أن نفسي تقرقع عقبك شنونها
يا لله أنا طالبك يا مبدي ويا معيد
يا مجيب دعوة عبادك يوم يدعونها
أنزل على قبره الرحمات عطه المزيد
نزول الأمطار لا هلت من مزونها
- عبدالرحمن الحمدان (أبو فراس)
* *
عساه بالجنات يا رب مثواه
جاني الخبر والعلم في يوم الاثنين
ياشين ذاك العلم وقت سمعناه
هذا الخبر في الشهم من ناس غالين
قال احمد الناصر رحل واحسافاه
في جنة الفردوس يارب آمين
الدرب واحد كلنا اليوم نقفاه
الشاعر المحبوب رمز الاصيلين
يازين جلساته ولا انسى مخاواه
ابو محمد من رجال عرببين
ولديرتي وقت دعيته ولباه
لوشيقر ابشر يارفيقي ملبين
وما قصر المرحوم وقت طلبناه
بجهود رجل من رجال عزيزين
ذا ناصر بن عريج الف شكرناه
كل الاهالي رحبوا به محيين
قالوا هلا يامرحبا في محياه
يامرحبا باللي لفونا مجيبين
انور وشيقر والسعد يوم لقياه
هذي سلوم اللي على الطيب ماشين
رجل حبيب والفخر هو مزاياه
رحل عن الدنيا بكوه الملايين
محمد بن عبد العزيز الخنيفر - أشيقر
* *
للادمي يومٍ مقدر ومكتوب
يرحل عن الدنيا القصيره واهلها
النفس عنها الموت ماهوب محجوب
الى دنت ما غاب عنها اجلها
وحنا فقدنا شيخ وافي ومحسوب
ونفسه على حب المراجل جبلها
شاعر علم في ساحه الشعر محبوب
اسمه سما بافعال طيبٍ فعلها
ذاك أحمد الناصر له الخير منسوب
وله سيرةٍ ما احدٍ يدور بدلها
حكيم راي ويملك اخلاق واسلوب
والى نوى الغايه بعرفه وصلها
على الجزاله والنقى يفتح دروب
وغير العلوم الطيبه ما قبلها
يا رب يا رحمن يا راحم ايوب
يا واحدٍ تجزاء النفوس بعملها
تجعله بالفردوس يا خير مطلوب
يا من جميع ارزاق خلقه كفلها
أحمد سعود الحمد - الزلفي
* *
باسم الإله المعتلي خالق الكون
رب العباد مكون الكائناتي
انت الإله اللي لك الناس يرجون
تعلم خفى الإنسان والبيناتي
امنت بك والخير بيدك ومضمون
يا باعث الإنسان بعد المماتي
تجبر عزى من يشتكي لك ومحزون
خيم عليه الحزن صبح ومباتي
اشكي عليك فراق غالي ومظنون
أمي عساها بجنة الصالحاتي
ياالله يااللي بيدك الكاف والنون
تغفر لها يا عالم الخافياتي
ادعولها تكفون يااللي تصلون
ادعولها يا مقومين الصلاتي
الأم نور البيت وانتم تعرفون
ان البيوت بدونها مظلماتي
فقدتها والناس حولي يعزون
وانا اكتم العبرات والحزن ياتي
فقدت راس المال واصبحت مديون
أمي تراها راس مالي غناتي
تكفون خلوني على القبر تكفون
باودع أغلي من فقدت بحياتي
الوالدة لها معزة وتدرون
الله ومر في طاعة الوالداتي
الأمهات عيون من لا له عيون
ببطونهن عشنا وهن حاملاتي
الأم تسهر والخلايق ينامون
ياما علينا يصبحن ساهراتي
لهن علينا حق واجب ومرهون
نبينا وصى على الامهاتي
وشلون ننسى الأم يا ناس وشلون
ما تنسي زهرة حياة النباتي
ياالله عسى أمي بين الانهار وعيون
بجنات فردوس خضر عالياتي
في رحمتك تجعل لها القبر مامون
وتزيد وزن اعمالها الصالحاتي
من يلتجي لك تقهر الصعب ويهون
يا رب عن نارك نريد النجاتي
واختامها يا عالمٍ كل مكنون
نطلبك يا الله تحسن الخاتماتي
- محمد بن ناصر العريني
* *
الموت يا ساحة الشعار، فالساحه
في كل يوما يشيل العود والقاصر
لو كل شاعر يرده عنه.. مسباحه
لن كان ما راح عنا بـ احمد الناصر
عساه فالقبر.. يلقى كامل الراحه
وفي رحمة الله مطوّق دوم ومحاصر
مع كل غالي بعد ما حلّ.. مرواحه
اقفى وقلبي لـ وجده عاصره عاصر
- محسن الهفتاء