لوطن غالي ولا يرخص بدراه

غير من عدوان دينه وهقوه

وما سعى طول الليالي في دماره

غير مخلف ملة جدوده وابوه

وكل من يقدح من الفتنة شراره

لو يطول الوقت يعرف علّموه

علمو ذباح ابن عمه وجاره

دمهم بايّات دينٍ حللوه

- الأمير/ عبد العزيز بن سعود بن محمد

يا وطن ذعذع هواك وجذبنا غيّه

وانت عشقٍ كل من مات به يحيا به

كلنا في ساعة الضيق لك جنبيه

لا عصبنا الروس لك يا وطن بعصابة

يا معلمنا ليا اشتبّت البرية

نستلذ الموت وقلوبنا وثّابة

من تزعزع عنك لا رحم ابو واليّه

لين حدك من دمانا يسيل ترابه

- عبدالله عبيان

حنّا الولا والانتماء والفضيلة

حنّا الوفا عز وعقيدة وطوله

صفٍ كما البنيان ساسه يشيله

تعجز خفافيش الدجى ماتنوله

وأرض الحرم والمجد الأول وخيله

مثل الأمانه بالصدور محمولة

أرض السلام أرض الرسول وخليله

أرض الكتاب الحق مهد البطولة

أرض القيم وأسمى الشيم والنفيلة

أرضٍ بها للمجد صوله وجوله

أرض الكرم. رمز اتحاد الفصيلة

تاريخها بالدم نكتب فصوله

- صالح الضويحي