الُطرقة اللي تبيّن صحبة اصحابي

يا زينها لو تطوّل بي مسافتها

يبين فيها الخوي فكاك الانشابي

طلق الحجاجين ماعقّد سماحتها

قرمٍ بوقت السعة والضيق ماغابي

تلقاه لو دنيتك ضاقت مساحتها

خوي فالسلم وان جا حرب حرّابي

نفسك معا خوته تضمن سعادتها

ويبين فيها الخبيث وكل نصابي

وضعاف الانفس تبيّن من ضعافتها

اللي بوقت السعة تفتل فالاشنابي

تهبد لك الصدر وتخفي نذالتها

تغريك باسلوبها وتثير الاعجابي

وتحط لك صفحة اخبارٍ بصحافتها

تحسب لضيقتك فوق ارضاك بحسابي

حتى تولع و تُعجب في صداقتها

لن جيت تفرح ولن ماجيت ترتابي

تحرص على شوفتك من شان حاجتها

لاجل المصالح معاك اصحاب واحبابي

واليا انتهت تنتهي معها علاقتها

وان شآفتك تايه بدربك ومنصابي

تبين لك وقتها قمة سماجتها

تتركّ وتحط بابٍ من ورا بابي

على فراقك وبعدك عن زعامتها

وتصير مابين ضرس الوقت والنابي

والصحبة اللي على المصلوح خاضتها

حنا بوقتٍ غريب نعيشه اغرابي

دنياً تساوت ثوانيها وساعتها

- حسين الحارثي