ارم العتب واللوم بالرايح الجاي

من شان ما يخطي سبيلي سبيلك

وانت القريب اللي من ادناي لاقصاي

ما يستعاض ولا يدور بديلك

ما للعتب واللوم طابع بدنياي

حتى تشوف بعين طبعك خليلك

بغيب اقول وقيد الصمت مبداي

عيا اللسان يطيعني ويحكيلك

طارف كلام ردته عضة اشفاي

مما يلوج بخاطري ويهذيلك

دورت غيظي لكن اخطيت برضاي

ما ادري صُدف وإلا ان قلبك دليلك

عجزت لا اقطع بين الأمرين في رأي

مير الوكاد رضاي من مستحيلك

حاول تدل النور في درب ظلماي

كمل مداخيلك وكمل جميلك

لو تغدي القمراء على درب مسراي

لقيت بعيوني نهارك وليلك

اما تسامحني بجملة سواياي

وإلا تجي ردات غيظي حصيلك

- صالح الرشيدي