الموضوعات الأكثر
كان قلبك يا حمام الورق ذايب
غن لي لين أتمكّن من هديلك
بن قلبي زعفرانه فيه رايب
وأحترق وأسمّر لك ولحب هيلك
حسبك الله لا تمنّيت الغرايب
ويش نفع نجوم الأرض بلا سهيلك
نجم الأنجد فالبلاد وفالنوايب
انحره وطويق للعارض دليلك
أفخري يا دار حلَّال النشايب
الفخر في كل حزّه يستويلك
ما عليك من العواصف والهبايب
الجبل ظلّه عليك وينحنيلك
يذكرون الناس في وصوفك عجايب
قالوا إن العين يملاها قليلك
يا بعد من تجتمع فيه الحبايب
لا تجين المجد بأعلامه يجيلك
ما وراك إلَّا العظايم والمصايب
والسيوف وكل قاسي ينثنيلك
يمشطن البيض بالحنَّا الذوايب
ويتمنّى السيف لو يمشط جديلك
والبكار الحيل وامات الجنايب
شيخن دقك وسيدهن جليلك
في كنف كفٍ همت منها السحايب
كف من كنّه على الصحراء وكيلك
ان بسطها للبعاد وللقرايب
كنّها تمطر لهم عشبه وسيلك
فاسمك معزِّي عبوسٍ للكتايب
في وجودك فالفخار وفي رحيلك
كم شجاعٍ ما يلد العين هايب
لا ظهرتي بين فرسانك وخيلك
ما تمقّل فيك ولخوفه سبايب
يمتلي صدره عجب لو هو حليلك
جود ربي وكرمه جزل الوهايب
مال بغصونه على سدرة مقيلك
والشعاع الِّلي عن النجمات تايب
عاد لسراجك وسافر من فتيلك
من ملوك ومن فحول ومن نجايب
صاغك الله بمْعروفه وبجميلك
لو تلدّين النظر في عين خايب
طاب فالرديان والعز لذليلك
والجزيره والعرب نصر وغلايب
من عدن لطريف حاشدك وبكيلك
ان جرحتي تمدح الناس العطايب
وان سمحتي ما شكا جرحه عليلك
إظهري من صلب طين ومن ترايب
الشرف ذروة جباله تنتميلك
يدفعه (سلمان) عطفه بالحرايب
ما حسب لمتيّمك يدفن قتيلك
سلهمي للخيل واغضي للركايب
هودجك يا نجد ما يزهى بديلك
إن جلستي فيه تبرالك كتايب
حارسك فيها وخادمك وخليلك
حاضرٍ عن شاعرك غالي وغايب
وألف ليله وألف لبدورك وليلك
والمديح حصان عاد من العجايب
لمّعذر عينك ولعبيّة كحيلك
وافخري يا دار حلّال الصعايب
الفخر في كل ساعه يستويلك
** **
- نايف صقر