يا عام الاحزان لا تبكي على شاني

خله لمن هو فقد حيّه وحيّانه

قصدك تخفف علينا بعض الاحزاني

يوم انت تذرف دموع ما لها خانة

اليوم ابي منك تتركني وتنساني

راضي على اللي قضاه الرب سبحانه

سهم المنايا ورد واحد ورا الثاني

وقلوب الاحباب بالاحزان غرقانة

وش عاد تسوى حياتي عقب خسراني

لخوي ابو فيصل اللي ذقت فقدانه

نبكي ونرخص بموته دمع الاعياني

والدمع فيه العزا لقلوب ولهانة

واجرح قلبي على فقده وما جاني

لو صاب صم الصخور يذوب صوانه

واحركبدي عليه اليوم ياخواني

عاد اليتم لي عقب ما فاتت ازمانه

الى نصيته وهم القلب عناني

يزيح همي ونفسي منه فرحانة

ويا ما عطى من وهايب واكرم العاني

يكرم ضيوفه ويرضي كل جيرانه

وياما برايه يوفق بين عدواني

يصلح قلوبٍ بقطع الوصل شقيانة

يا الله تجزاه عن هذا بالاحساني

ويوم الحشر بحسناته ثقل ميزانه

اسال ربي عظيم الملك والشاني

يضفي على من رحل عفوه وغفرانه

** **

- فهد بن عبد العزيز الفايز