ياليل ظماك توحش في عيون الحنين

ونسايمك لي آنين ونجمتك لي سهر

أخذت منْك الغموض وخذتني لك حزين

خذيت منك ظلام وخذت مني قمر

سنين عمري هدر في دورة الطيبين

وسنين عمري ثمينة بس راحت هدر

لا يازمان الخيانة واطيب الشامتين

وخذلان يسكن صدور ودم سايل غدر

لا زان وقتي فعيني كل صاحب يزين

ولا شان وقتي فقلبي كل هقوة جمر

الوم جور الزمن والا البشر ظالمين

الوم صدق الوفا والا الوم البشر

والا الوم المواقف في غياب الضنين

لا صار درب المعزة بين جبر وكسر

ماعاد باقي شعور الحين للغايبين

لكن باقي دروس اشوف منها عبر

وشلون داخل حياتي غابوا الحاضرين

ووشلون في ذكرياتي كل غايب حضر

وصارت دموعي تطيح الحين في بسمتين

ماهيب والله غريبة دام حزني كبر

ياليل بصبر مدام الناس لازم تبين

لكنّ يذبح ياليل أن جات عشرة عمر

** **

- يزيد القباني