الموضوعات الأكثر
قصيدة موجهة من الشاعر صالح الناصر للشاعر محمد الفالح:
ياياذيب نار المشاعر تلتهب حية
والبال مسرور والتفكير يجتالي
اشرف براس الجبل واقف على الطية
واليا تمثلت ما خففت الامثالي
خليتها في صميم القلب مثنية
تذبح لها آمال لكن تحيي آمالي
سوق الذهب مايرحب بالشريطية
ومن عنده معارضة دربه على الخالي
مانيب اغني على سلام ردية
وان قيل موال ماغنيت موالي
طبعي كذا والثقة دايم ضرورية
ما تثقل انفوسنا وعلومنا اثقالي
عموما الشعر هم وذات اهمية
لو غبت عن ساحته ما غاب عن بالي
اشوش اليا اوحيت للابداع مارية
واطوّح عمامتي واللي على بالي
نبغى التماثيل واللمسات فنية
فرايدٍ في محيط الذوق تختالي
ابي ليا اوحيتها مليون بالمية
اقول لله در الشاعر الغالي
عن ساحة الشعر لك نظره خصوصية
يا محمد اشرح لنا عن كل الأحوالي
عندي على الشعر والموروث غارية
لعل الاول يعّلم حضرة التالي
يا سامع القيل والراية سعودية
الصدق يبقى ولو كثرن الاقوالي
لو يكثر الخير والبلدان محمية
المرجلة ما تهاوي كل رجالي
- صالح الناصر
* * *
وهذا رد الشاعر محمد الفالح على قصيدة الشاعر صالح الناصر:
وصلت معاني بيوتك واثرت فيه
قريتها فالرسالة وسط جوالي
من شاعرٍ بصمته ما هي بعادية
له سمعةٍ في الجزالة ضغطها عالي
مذكور بالخير ياراعي البجادية
لو انت من هضبة الزلفي تغنا لي
لكنها ديرة اللي تنطح الهية
اهل الوفا والكرم ذربين الافعالي
لك قصد يا صالح الناصر ولك نية
ونا على مقصدك سطرت الامثالي
عارفك شاعر وشعرك له خصوصية
شكيت من حاجة منها برا حالي
الشعر تالي زمانك راح عارية
بعض الطواريق ما القّي لها بالي
يا ليت حاضر زمانه مثل ماضيّه
والفرق في الشعر الأول يغلب التالي
واليوم في ساحة الشعر الخليجية
شعار في ساحة الميدان ورجالي
لكن طاح العمود ومالت الفية
منها سبب ضيقي وهمي وغربالي
وين الزلامي وبن هذال والعية
رجالهم بالشعر يضرب به امثالي
راحوا وحنا بعدهم نارنا حية
ندور سمانها ونكب الاسمالي
وصدورنا يا اهل الزلفي شمالية
نصبر على شينها والمر والحالي
- محمد الفالح