ضَيّقَتني داخل البيت جدرانه

خافقي مكبوت والناس مسرورة

بيت كنّه سجن ما شفت سجّانه

من كآبة منظره هَجّت طيوره

مع خيالي لو طغت كل حيطانه

ما انسجن تفكيرك الحيّ بَدّوره

ليتني يا ليتني كنت شيهانة

أخفق الجنحان مانيب محجورة

كان طرت وجلسة البيت لفلانة

مع عديلٍ كنّه الضبّ بجحوره

هاجسي والقلب ناداك باشجانه

والخيال علاجه وطب دكتوره

دام شعري جَوّ الافكار ميدانه

ما خذلني لحظةٍ كنت مقهورة

يا قصيدي دام الاعماق طربانة

خذ بدور الشعر لفياض ممطورة

حروة اليومين والأرض مليانة

ديمةٍ من خالق الخلق موفورة

لين سالت بالمطر كل شعبانه

يضرب الجيلان يدهشك بحضوره

من جمال البيد لا شفت غدرانه

كل هم تزول طرياه وشروره

معك أنا والليل والقلب سهرانة

جلسة تعبر عن الفرح وشعوره

مجلسٍ تنشاف بالبعد نيرانه

كنّها التكرير من راس تنورة

** **

بدر البدور - القصيم