منقية الشاعر من الندّر الخود

تفرق مثل فرق الفتى عن سنينه

اليا تسامت عانقت قمَّة الطود

اللِّي يحول البعد بينك وبينه

ما ينحرم من كسبها غير مقرود

باسباب دعوه من حدا والدينه

ويظفر بها فكرٍ مع الجزل موعود

وراسٍ يعشق الغاليه والسمينه

يفرح بها كنّه مبشّر بمولود

ويضمّها من بين راحة يدينه

ما كنّها إلاَّ جمرةٍ تحرق العود

وتضفي على المجلس وقار وسكينه

تنصى المقام اللِّي بلا شروط وقيود

من راس شاعرها تصافح يمينه

عاد انت يا محمد ترى مالك حدود

غبّة بحرك تضيع فيها السفينه

والله يا بن سلمان ما عنك منشود

ما فيه مجدٍ ما كسبته بحينه

افعال وانجازات وامجاد وجدود

واللي يبي مدحك عسى الله يعينه

خوالك الحثلين واهلك آل سعود

وعليك لمعزِّي ملامح وعينه

مليان راسك من دها جدّك العود

الفعل سامي والمعادن ثمينه

سليل مجد ونسل شجعان وفهود

ومرباك في دار الاسد وعرينه

وش عاد باقي فوق هذا من الزود

تاجٍ على وجه الزمان وجبينه

خلقت مكتوبٍ على كفّك الجود

ما هي بقفلٍ دون باب الخزينه

والغيمة اللِّي ساقها يمّك النود

مبطي وهي بين الحنايا سجينه

** **

- الهاب الوسيدي