يا مدور الفايده فضلٍ من احسانك

ابا انصحك والنصيحة لا تضيعها

احسب حسابك وخذ عبرة من ازمانك

قبل الليالي تصيبك في مواجعها

قدم لنفسك ولا يغويك شيطانك

فكر ودقق حساباتك وراجعها

في طاعة الله تزيد ويرتفع شانك

النفس طاعة كريم الوجه ترفعها

لا تاخذك غفلة الدنيا ونسيانك

لابد دنياك يابن ادم تودعها

والطيب لاصار في دنياك عنوانك

امورك الباقيه تقدر تسنعها

والى تكلمت عدّ الحق بلسانك

الكلمة الصايبة يغليك سامعها

وخل المجامل ولا يختل ميزانك

لو الليالي تحدك في مطامعها

وخل التنصع وقفّل عنه بيبانك

كم عالمٍ مشكلتها من تصنعها

ومن حب ذاته بليا شك ما عانك

الارض ربك عن امثاله موسعها

هذي نماذج تشاهدها بميدانك

ما معك قدرة تغير من طبايعها

والخاتمة لا تضيق وتكثر احزانك

ما دام سنّة شفيع الخلق تتبعها

** **

أحمد سعود الحمد - الزلفي