يالله عسى مزنٍ تلابد ركيمه

واضحى من القبله شواهيق وجبال

كن الجبال السمر فيها امقيمه

تمشي على هونٍ بواهيت واثقال

اللي من القاصي للقصى امهيمه

تفرض بهيبتها من الجال للجال

اللي عليها عروق برقٍ صطيمه

يجعل سنا نوره من الليل مدهال

تسمع جلاجل بالرعد مستديمه

تانس مطرها ولابعد جاك همّال

تمشي على يمّة اديارن كريمه

باطراف عرجا بين جمران والضال

وينزل من المولى ويحيي هشيمه

وتزهر مطاليع الوسم حيث ماسال

ويمشي على خضابن تدارى لطيمه

ويصب في سلعن على الشعب تنهال

ويدحم على جاله وتسمع زخيمه

سيلن يزين بمنظر الشعب لامال

وبيت الشعر مبني اجدادن قديمه

ومشرعن تيزاره ايمين وشمال

في مقدمه لهل القلوب السليمه

جلسة اشدادن مابها القيل ينقال

في منظرن مافيه شيٍ يضيمه

لاصار حمال المطر فوق خيال

يداعبه عشبن يذعذع نسيمه

يعج مع بنن على النار فدلال

في خايعن يلبس مع الريع ديمه

يزين مع شبة هل النار فنجال

ون هو تشوم بناظرك تستهيمه

في مشهدن مابين شادد ونزال

والله يديم الامن فوق العظيمه

دار السعود اللي لها القلب منزال

** **

- عبدالله بن منيف الحبيل