كل شيء يمرّني فالعمر أعدّه خيره

دامين ما كل شيءٍ فالحياة أختاره

أرجي الله كل ما أصبح فضله وتيسيره

وآتذرَّا في حروزه واحتمي بأذكاره

وكل ما جاني من صروف الزمان مغيره

أحتمي بالله ولطف الله يرد الغاره

ما اكتويت ومن فضل ربي ما أعرف الطيره

ولا أتشاءم لابدا لي فالصباح غباره

ما خذيت العمر سجّه ما خذه في حيره

حاسبٍ لأيام ما يلقى القدم معباره

شفت ما عاق الفؤاد وما حبس تعبيره

وما سرح بالعقل وأنحى به وزاد أفكاره

ما ظهر لي ليتني ما قلت أبي تفسيره

وما خفاني ليتني ما قلت أبي إظهاره

لو نقول الوقت داير وش سبب تدويره؟

ليش قلنا طاب تاره ثم تردّى تاره

ماضي الأزمان سيره حيّها من سيره

وتالي الأزمان كنّه ناقصٍ مقداره

إنشد الجيران عن باقي علوم الجيره

وش بقى منها وكلٍ ما يطال جداره

وانشد الأقراب عن تالي علوم الديره

واحد من الألف من يبْهجك ذكر أخباره

وانشد الرجَّال عن سرٍ دفن في بيره

الأخو ينسى أخوه من البطا ما زاره

وإنشد الرجّال عن نفسه وجنّب غيره

كمّ راعي دار ما يدري بحالة داره

آه من وقتٍ علينا بيّن التكشيره

وآه منّا كيف ضيعنا وسط تيّاره

عايشين العمر نحسب عليشنا تصبيره

وكسرنا مدري متى فينا يبين جباره

للأمل ما عاد عندي غير قولة: خيره

دامني ما كل شيءٍ فالحياة أختاره

** **

- مرزوق الروقي