الموضوعات الأكثر
سلام ما سبل على العارض قنوف
سيله عليها من المزون الرفيعه
سلام يا اللي له على الناس معروف
يا الفيصلي يا فخر مضر وربيعه
ليث ٍ على كل الضواري وبك نوف
ونجم ٍ على كل الكواكب لميعه
ولي عهد المملكة وأنت معروف
تشيل حمل اللي عجز يستطيعه
من لاذ بك من خوف ما يلحقه خوف
ومن الجوع تملون البطون المجيعه
يا لحاتمي ما راح للخلق مخلوف
ويمناك يا محمد ما يلحق صنيعه
تستقبل العالم مسايير وضيوف
وتواضعك للشعب حب وطبيعه
وهيبتك تردع كل جاهل وملقوف
ونفسك على الخصم المعادي شجيعه
وحيلات الأعداء ما هي تمر وتطوف
خادم بيوت الله وممّن منيعه
قصرك عليه أورود بمئات وأولوف
وعدلت بين الناس سنه وشيعه
وهداج يردونه قويْين وضعوف
يا أبن الملوك محكمين الشريعه
ما جاتكم يا كود برماح وسيوف
وتبطِّح إيديها السباع السبيعه
لكم علينا حبة خشوم وكتوف
وبرقابنا لكم على الحكم بيعه
ننطح وجيه القوم بصفوف وصفوف
ولا ضرينا بالفتن والخديعه
ولا غير رب البيت نرفع له كفوف
ولا نحب أهل الهجر والقطيعه
وحبل الولي ماهوب عهن ٍ من الصوف
ونموت ونحيا والوطن ما نبيعه
حنْا مع سلمان جلاس ووقوف
عسي محمد يوم يبعث شفيعه
تسلم لنا وتدوم من كل صادوف
وتبقى لنا مثل الحصون المنيعه
** **
- منصور بن محمد بن منيخر