انتبهت لدمعها بالهدب والكحل سال

لين جفت عينها دمع والقاع ارتوى

وابتدت لحضة جفا وانتهت لحضة وصال

وانطفى نور السعادة واحسب انه ضوى

ما اكتفيت من الهوى والغرام أربع ليال

واقفت أيام التلاقي وجا وقت النوى

كنت ابلسى وابتسم والتفت عنها شمال

لا قويت الصد عنها ولا قلبي قوى

ما هقيت ان الهوى عذّب قلوب الرجال

لين ضاع القلب مني وتفكيري سوى

رحت أدور دفوة الشمس ضيعت الظلال

جيت اطفي شعلة النار والقلب انكوى

ماهقيت ان السعادة خيال في خيال

تروى قلوب الحبايب وقلبي ما روى

كنت ابشتال الهوى والهوى ثقل الجبال

وان تحملت الجبل ما تحملت الهوى

كنت ابسلى بالهوى والهوى صعب المنال

ما رضا لي حظي اللي طواني وانطوى

قلت لا فراحي تعالي ولا قالت تعال

والخفوق ان قلت ابقبل على صدي نوى

الله أكبر لا اشرقت شمس يتلاها زوال

كيف ابفرح في صباح مع الليل استوى

لاحصل بالحب قسمة ولا جا لي مجال

غير اشوف معاند الجرح وعناد الدوا

شبت النيران واقفت وجا رد السؤال

ما تشب النار يا كود يوصلها هوى

** **

- حامد زيد