حار الكلام ولقا من داخلي حرفٍ وصوت القصيد

واستسلمت له مشاعر والضلوع العوج من دونها

والصدر يغلي غلا يا صاحبي وأحس ذاب الوريد

حسبي على هالملامح والبشر وشلون يقرونها

أضيق رغم الفضاء وأشكي على صبري وحبلي مديد

وسمان هرج العرب يمِّي ولا لدّيت لردونها

بأسباب غروٍ خذا كل الحلا شيخة مقامٍ وغيد

أمانةٍ غاليه مثل السماء مابار مامونها

بنت الجمال وطغى عنقٍ وقد وزود خدٍ وجيد

والكحل ليلٍ على رعشة رموش الزين وجفونها

لبِّى عيونك تطبّعني على كيفك وطبعي عنيد

محبةٍ لابدأ نسناس غربي مالت غصونها

والحر لامن شلع يانور عيني ما يجيب الزهيد

والهقوة اللي على بالك ترى ماجاك من دونها

هزّيت جذع الكلام وطاح من قمته عقدٍ فريد

عقد فريدٍ روى قصة غلا ليلى ومجنونها

** **

- سلطان بن عامر العتيبي