الموضوعات الأكثر
يا رب ترحم شايبٍ هزلت اعضاه
أوجس ثيابي فوق جسمي ثقايل
لا اقبل سمار الليل ودي بفرقاه
بلاي من سهرٍ على العين طايل
يا رب خفف ذنبي اللي جنيناه
مجتاج لك لا ركزن السلايل
لعب بي الشيطان وابليس طعناه
وكسبت في جهلي ذنوبٍ ثقايل
عند الخلايق جاحدٍ ماكشفناه
لاشك عند الله تبين الحصايل
خضعت لك ياللي حياتي بيمناه
بمقابلك ماعاد عندي دلايل
يا رب كل اللي عطيتن فقدناه
ما باقيٍ يارب غير القلايل
غديت مثل الطرقي اللي قضى ماه
في نقرةٍ فاحت عليه القوايل
انا بدبرة خالق الكون ورضاه
محي العظام اللي لحافه نثايل
دنيا بها الشايب شكى من دناياه
ماعاد ادوّر من وراها حصايل
يا جودهم لامتّ قالو دفناه
يرحمني الخالق منشّى المخايل
اللي فعل خيرٍ بدنياه يلقاه
يلقاه عن اللي يصفي المكايل
ومن مات لايجهل ترى القبر ملفاه
يبقى الولي واللي على الارض زايل
لابد من يومٍ يجمّع رعاياه
امره عظيمٍ يالقلوب الهبايل
العفن زوره باقشر الهرج يملاه
لا تكشفه مافيه غير الهزايل
** **
- محمد بن هزاع البليهي