هبّت وشبّت جمرة أشجاني وثرت

سرّتني الانسام تالي قصيِّر

حنّيت واشتقت وبكيت وتكدّرت

واصبحت من عقب السكون أتطيّر

وش كنت وقتٍ فات واليوم وش صرت

الله ليتي في حياتي مخيّر

ما كنت فيني يا منى خاطري برت

وخليتني بيدين همي مسيّر

يوم أنت غرّتك السنين وتغيّرت

وأنا أحسبك طول الزمن ما تغيّر

ليتك قبل لا تنوي البعد فكّرت

في حال خلّك يالجفول المذيّر

وأنا أدري إنك من بعد فقدي أحترت

زلّلت قدمك وصار وضعك محيّر

حتى العذر يافاتني ما تعذّرت

لكن أعذرك لأن توّك صغيّر

اليوم ذكرك هب في قلبي وثرت

ذكرت وصلك في توالي قصيّر

** **

- مرزوق الروقي