ودعتك الله ولو ما بعد فقدك حياه

لكن على الله والدنيا هذا حالها

البعد سنّة حياه وسكةٍ للوفاه

لا حلْ، عل القلوب وموَّت آمالها

روحي ولو ما الخطواتي بَعَدك اتجاه

دروبي إن ما انتهت بك مالي ومالها

غيبي، وقلبٍ تعلّق فيك فأول صباه

نَوّخ وجملة جروحه كلها شالها

بفقدك لا من همّي جاب لي ما وراه

إليا طردتني جميع الخلق من بالها

لا صرت وحدي ويومي سرمديٍ مساه

وملّت فضاي الهموم وطاب منزالها

والكون كنّه على الشبرين خلاَّ مداه

والأرض خَبّت نساها وأبقت رجالها

بفقد حنانك إذا اشتد الزمان بقساه

ولا حولي قلوب من حرماني ألجالها

قلبك فقيده عسى الله ما يبيّن غلاه

لو ساعة موادعك مرّتني أهوالها

واليوم لو الخفوق يقول لك وش بلاه

بعض السوالف رحم قلبك ولا قالها

ما دام دربٍ مشينا به وصل منتهاه

ولا عاد بيديننا حيله ونحتالها

ولا عاد بقلوبنا ياكود ونَّه وآه

نهاية فصول دنيا ما حسبنا لها

بودعك والعزا وقتٍ كشف عن رداه

روحي وانا اروح والدنيا هذا فالها

وان جاك بعدي من يقول السعادة معاه

قولي حبيبي قبل لا تقولها قالها!

** **

- مرزوق الروقي