تدرين يا حلوة متى العاشق يحس بمهزلة

لاجاه شي مثل شي قام يحداني حدي

ما أقسى من دموع اليتيم إذا ذكر ضحكة هله

ولايهد من الفراق إلا الفراق السرمدي

الوردة إللي في شرايين الحشا متغلغلة

ياروحي اللي لو تبرّت مني أختل جسدي

كونت لك عالم غرام مادخله البلبلة

إلا هدير ينتهي بين الضلوع ويبتدي

حتى أقرب أصحابي من اللوعه سهيت وقلت له

يا الاجودي كف العذل مافي العواذيل اجودي

انا إللي استاهل عناقيد العنب يا مدلله

ليتك دريتي كيف عيني تذكرك في مرقدي

يا ادنى من الغيم ان تغطرس واطول من السنبلة

يا أقرب كثير من الحكي وابعد شوي من الجدي

إن جيت رحتي مقفية وإن رحت جيتي مقبلة

كم متّ..وليا قلتي «أحبك»تجدد مولدي

دنياي انا لو هب تجتمع لذاتها في مكحلة

والله ما أشهر لأي عين غير عينك مرودي

ياذابحتني.. كل شي إلا الجفا ما اتحمله

ياكبركذبة عزتي لو قلت أببعد وأبعدي

قلبي لو أغديتيه في الصحرا بليا بوصلة

ماتاخذين إلا وهو لأقصى ضلوعك مهتدي

وأن خاب ظني وآخر المشوار جا مثل أوّله

بغمّض عيوني وأبحلم وأقهر الحظ الردي

بأحلامنا حتى أخر المريخ نقدر نوصله

الله..لو نطلع بساط الريح وايدك في يدي

تخيلي روض من أقصاه أجمل الورد أحمله

وأهديه لأيدين وظفاير شيخة الورد الندي

تخيلي نهر بالأحجار نتمثنى جدوله

نبقى على جاله جلوس شوي وشوي نعدي

تخيلي بيت دفاه من المواجع والوله

ضحك وسواليف وسهر ومزوح وبساط أحمدي

تخيلي عشق عجزت أستوعبه وأتخليه

كانه على هالحال ما عز الله أبشر بسعدي

ياسيدة عشقي وأنا راعيه راعي الأوّله

ماهي كثيره لو تقولين أنت والله سيدي

ترا الله إلي حط لك ذاك الغلا والمنزلة

وإلا الهوى لا ورث أبوي ولا ذخرته لولدي

حبيبتي مايقهر الرجال في مستقبله

الّا الهوى اللي مرةٍ يقبل ومرات يغدي

حتى الوفا لا زاد عن حده يعود مهزلة

ياليتني خنتك ولا إللي قام يحداني حدي

** **

- ناصر القحطاني