كفكفي حزنك بأسافر عن دموعك واستريح

لين أخلِّي وادي الفضه يسيل بلا جراح

كنت لك أول حبيب الحين انا آخر جريح

كان يضحك بك على روحه ولا يوم استراح

ما تصوّرتك تجين ولك وسط قلبي ضريح

كنت أحس إن القلوب الوافيه ما تستباح

لين مرّتني سواليفك وأنا بعدك طريح

علّمتني ليش خان الدمع منديل السماح

أذكر إنك قلتي: الحب الحقيقي طفل ريح

مر في كل المداين ما كبر فيها وراح

ما انتظر يوم بمدينة فيها عاشق مستريح

هو يصير الحب حب إلاَّ على روس الرماح؟!

وانت لو ما شفت قلبك في وسط صدرك ذبيح

ما تخلّد مثل عاشق في حكايات الملاح

قلت: يا بنت الهوى يكبر بعينك أو يطيح

بس هذا كذب عيني عينك اش ذنب الرياح؟!

الهوى لو ما نصف راعيه عايش مو صحيح

إننا نذبل جفاف وغيرنا يروى قراح

والحقيقه كل ما في الأمر بالعربي الفصيح

كان لك قلب بيطير وقلبي ما يصلح جناح

كفكفي حزنك دخيلك والزمن ماهو شحيح

بس لا نعشق بعضنا الليل ونموت الصباح

** **

- د. محمد علي الحربي