تعال اسولف لك من الراس للراس

أنا ما عاد أقدر اجامل سكاتي

محتاجك توايق على حدب الاقواس

وتشوف وش سوَّى الغياب بحياتي

لو ينبع الما من عوافي ولا باس

ماجف دجلاي.. وتبخّر فراتي!

واقف على حد العطش واحرث الياس

كنّي أبزرع في جفافي.. مماتي

ليتك عطر وتهب مع كل نسناس

واشرّع ضلوعي على اربع جهاتي

للحين وعروقي من الوجد يبّاس

للحين وانت أكثر دعاء في صلاتي

للحين أفكر فيك من بد هالناس

للحين وانت أغلى وأعز أمنياتي

للحين أقول بكل ما أملك من احساس

الحلو في مستقبلي ذكرياتي!

** **

- محمد جارالله السهلي