الموضوعات الأكثر
وقت الشدايد يكشف شعوب وأوطان
ويكشف قيادات الشعوب الحكيمه
واللي تبيّن فالوسائل للاعيان
بيّن لنا كم هي بلدنا عظيمه
في شخص أبونا سيد الدار سلمان
ومحمد النابه عسى الله يديمه
حكامنا حنا لهم رمح وسنان
ورجال فعلٍ فالمواجب هميمه
ما همنا وش ردّد فلان وفلان
خطو الفدامه والنذل والهليمه
ميزاننا راجح على كل ميزان
عدلٍ ولا به للخلايق هضيمه
كم دولةٍ ذلت بفيروس كوران
وكم شعب شاف البهذله والهزيمه
ما شاف من حكامها غير خذلان
وعواقبٍ حلت عليهم وخيمه
والمملكة حطت لنا بينهم شان
عز ومعزه واحترام وحشيمه
يا متهمنا في هضم حق الانسان
شف كيف حاكمنا عطا الشعب قيمه
حقايقٍ ما هي بحاجه لبرهان
حزم وثبات ومنجزات وعزيمه
محزم وطنا بالوفا حيل مليان
نارد ونشرب والظوامي محيمه
لنا وطن وافي على مر الازمان
ومواطنه ما فيه منهو يضيمه
ولنا سياسه خطها ذرب الايمان
يقطع بها دابر فساد وظليمه
في ذمتي هذا الوطن فخر الاوطان
وكل الفخر مستوطنٍ في زعيمه
وفي ذمتي ما يكرهه غير شيطان
أو حاسدٍ نفسه حقوده لئيمه
ياهيه يا اللي بالولا يعشق ايران
مودتك لاهل العمايم جريمه
من عالجك من لبّسك ثوب الاحسان
منهو يدينه لاجل تشفى كريمه
هذا الوطن حطه على الصدر نيشان
وأفهم ترى بعض المبادي عقيمه
الله يديمه في حضن أمن وايمان
ويذل في عزه معزة خصيمه
والله يديم اللي على الروس تيجان
آل السعود أهل القلوب الرحيمه
حكامنا مع شعبهم أهل واخوان
من فضل ربي والعلاقه حميمه
علاقةٍ ما بين حضرن وبدوان
ومحبةٍ من عهد الأولى قديمه
من راعي العوجا إلى عهد سلمان
الدعوه اللي من بدت مستقيمه
دم يا وطن شمسٍ على كل الاكوان
وآيات شكر ونعمةٍ مستديمه
كنّك بعزك للمسلمين عنوان
وكنّك بغيثك للمحبين ديمه
والله ثم والله مع عشرة ايمان
أنك لعشاق الفضيله غنيمه
** **
- محمد بن سعد العجلان