الموضوعات الأكثر
يا معاتبيني يوم بوح الصدر صام
ترى الشعر ماهوب عندي وظيفه
احيان ابيه وترجع هجوسي حيام
لو ان خطواتي بدربه مريفه
وأحيان أقوله من معاناة وآلام
وأحيان يدوي بي خيالي وزيفه
وألبّسه من حلّة العز هندام
حتى من يعاديه يصبح حليفه
واليوم اشوفه بين بايع وسوام
ما عاد هو وسط المجالس طريفه
وكبرت واحلامي مهي مثلها العام
واللي براسي طاح منه النصيفه
جتني مغاتير النذر ترزم ارزام
وقفّت مجاهيم النواصي معيفه
ما عاد فيني حيل يا برد الاحلام
اوجست من سود المقابيل خيفه
وريف العمر لو داعبه قوس الانسام
لابد من يومٍ يجي له خريفه
يا معلّق أمالك على دنيا الاوهام
خبرت من جت له على كيف كيفه
ربيعها لو شاخ قافيه صرّام
يبين لك في مقبل الوقت حيفه
محدٍ مخلد فوقها حتى الإعلام
توارث الاجيال جيل ورديفه
اشرف بشر راح وتركها ولا دام
ولحقو به أصحابه خليفه خليفه
غير اقتنع بأن العمر بضعة ايام
ويجيك من يفرق وليف وليفه
عليك بالتقوى وتطبيق الاحكام
ما جات بايات الكتاب الشريفه
قلته وانا مقصّر وللنفس لوام
تعبت احايلها سوات العسيفه
يالله ثبتني على دين الاسلام
وأسألك ياربي بياض الصحيفه
وثقّل موازينٍ رعت فيها الاثام
اليا وقفنا والمزاهب خفيفه
** **
- نهار ممدوح