الموضوعات الأكثر
في ليلة من نورها يخجل النور
مشاعري لمصافح يديك ولها
على ثراك ايامنا افراح وسرور
يا دارنا اللي ماندور بدلها
يا اطهر ثرى تاخذ من الشرع دستور
واللي حكمها بالعداله عدلها
عبدالعزيز اللي تساوى على الكور
عدله شمل شبه الجزيرة واهلها
عقب الفقر والظلم والضيم والجور
والعنصريه والنفوس وجهلها
وقت السنين الشهب واعيونها العور
وابليس بين الناس يشعب جملها
جاها الامام اللي من الظلم ممرور
وعلى كفوف العز قام وحملها
طهّر ثراها من هل الظلم والزور
وثبّت قواعدها وعدله شملها
لم الشتات اللي على الارض منثور
واكرم قبايلها وربك قبلها
من الطوال لحد عرعر وااباالقور
وعين الخليج لبحر جده غزلها
وحد كياناً كان موحش وديجور
فيه البشر تسبا وتوخذ حللها
واعلن لها اسماً بين الاقطار مشهور
المملكه واسم السعودي بطلها
ورفرف علمها باسم من نزل الطور
الرايه اللي ما تنكس شهلها
مامات ابوتركي ولاغاب له دور
وصا اعياله واخلصت في عملها
تسلسل الحكام بالدور بالدور
علم وحضاره والجهاله قتلها
تطور العمران باابراج وقصور
معالماً كن السحاب يختلها
استاذ ومهندس وعالم ودكتور
وسواعداً للعلم كلاً فتلها
في صف واحد وقف الشعب طابور
شعباً يجمل دولته ما خذلها
ياخادم البيتين مشكور مشكور
يا قلب الامة يا سعدها واملها
جناح الامة دون وقفتك مكسور
اطلع بهيبتها لشامخ جبلها
يا ابن الامام اللي بك الدين منصور
يا من جهوده للعروبه بذلها
المسلمين بخير والحال مستور
واهل الجدل كلمتك تنهي جدلها
اللي يغير كلمة الحق معثور
معثور لوشخصيته ينتحلها
حنا اصقور الدار في خدمة اصقور
في بحرها في جوها في سهلها
واللي مع العدوان منهي ومامور
ليا زلت اقدامه يواجه زللها
يقدم ترى قبره مجهز ومحفور
حنا على قتله شفاقا وولها
واللي هجر داره من الناس مهجور
ينسا خليتها ويحرّم عسلها
حنا ولانا فعل واحساس وشعور
لملوكنا اللي ماندور بدلها
اعيال من جعله من الذنب مغفور
في جاه من رزق الخلايق كفلها
** **
- سلمان بن عزيز الحافي