الموضوعات الأكثر
اخذت من بعض المجالس دلالات
ولاني على بعض المجالس شفاوي
من لاعرف قدره بعد كل مافات
إن طاح والله مايطيح امتساوي
مناكب الدنيا طوالن عريضات
ماحققت حلم الفقير المناوي
يالله عن اللي يبحثون الخفيات
ويالله دخيلك عن خبيث الحكاوي
(الحكي شذرة سيف في بعض الأوقات)
وهرج القفا مضراب شلفا العطاوي
اخفيت شي ولا تناسيت شيات
واخذت من درس المجرب فتاوي
يالايمي في قصرت الرجل حسنات
جنبت عن سيل الشعيب النحاوي
مجلس يضم الهمز واللمز بالذات
جنب عنه لو كان تجلس خلاوي
لو انه بقصراً كبر ضلع ابانات
أبعد وخله يا بعيد الهقاوي
عليك برجال الفخر والمروات
ياحي شوفة محتمين العزاوي
اشوش للطيب زبون الصعيبات
والا القهاوي تقتفيها قهاوي
حلو النبا من دون ريبه وشكات
حراً على صيد الجزيله رهاوي
في مجلسه ذكر السنين القديمات
وسوالفٍ بالطيب مع كل راوي
خوي جنب ويرتكي للثقيلات
وعند الشدايد بالمواقف حماوي
قولة هلا يامرحبا عشر مرات
اخير من كثر الحكي و الدعاوي
هذي مجالس كاسبين الجمالات
خلك سما ما دام نجمك سماوي
** **
- عبدالله بن رجاء العنزي