الموضوعات الأكثر
حرب البعيد يوحّد الصف ياحمود
بس البلا ياحمود حرب القرابه
اللابه اللي بينها الهرج موجود
أشهد شهادة حق ماهيب لابه
هرج القفا بالناس عيبٍ ومنقود
كلمه وتكبر لين تصبح طلابه
يبلش بها العاقل من أفعال مقرود
الجاهل اللي مايحسّب حسابه
والبيت لاشيّد على كذب وجحود
مهما كبر يرجع على أصله خرابه
ياللي تقول ان الفهد ينجب فهود
ماكل نظرات الأوادم تشابه
الطيب ماهو ورث يُورث من اجدود
شف كم ذيبٍ ما يعقّب ذيابه
كم واحدٍ اسمه مع الناس في زود
عقّب عيالٍ في ظلال وكآبه
عندي على هذا براهين وشهود
بعض الشباب بليس خيّب شبابه
كم واحدٍ يجهل وهو شايبٍ عود
يتبع هوى نفسه ويجهل صوابه
الجود ماكلٍ ترى يقدر الجود
والا الردى ياحمود مفتوح بابه
ياحمود ماخنّا مواثيق وعهود
لا والذي للناس نزّل كتابه
ادمح خطأ مساعد علشان مسعود
اسكت حياء ماهوب خوف ومهابه
والصبر له حكمه وله وقت وحدود
اصبر على العجّه برجوى سحابه
من لايعشق المجد مايكسب الفود
هذاك خبلٍ ساتراته ثيابه
لعيون بنت العز لعيونها السود
الذل مااحدٍ من ربوعي رضى به
حنّا ترى ياحمود حمّاية الذود
يوم الليالي يابن عمي نهابه
يؤمنها مابين سيفٍ وبارود
سدنا رعاك الله في شرع غابه
واليوم صارت كلها سهود ومهود
نركع لوجه الله ونرجي ثوابه
** **
- سعود الفهد المطيري