الموضوعات الأكثر
مهدي العبار العنزي
باسم ربٍ لادعى عبده يجيبه
خالق الإنسان وارزاقه كتبها
له نصلي له نصوم ونلتجيبه
فارج الشدات ومخلص کربها
يا كريم ما دري غيره بغيبه
دعوتي يا الله يا رحمن اجبها
احفظ اللي كل شعبه يعتزيبها
خادم البيتين يفخر في لقبها
من نصى مکه ومن هو زار طيبه
توسعاته شامخه محدٍ حجبها
المليك اليا دعانا ننتخيبه
نخوةٍ رمز الوفا عنده وجبها
خذ وفانا جاك ماجالك غصيبه
وخذ عهودٍ من كتبها ماشطبها
سيدي ماهي على شعبك غريبة
ساكنٍ بقلوبنا حبك كسبها
صاحب الأريا السديدات الصليبه
والفضايل مالكٍ بالعز ادبها
يوم نادت له فلسطين السليبه
مانساها ماترجى من سلبها
ويوم صاح القدس من هول المصيبه
فزعته دوى مع العالم غضبها
واليمن ماقال حناوش نبيبه
يوم الحوثي عاث فيها واغتصبها
مارضى مبدا التهاون والغليبه
والمجوس الفرس بأمر الله نكبها
جهز رجالٍ عدو الله تصيبه
الصقور اللي على الجبهه ندبها
وجهوا للحقد ضرباتٍ عطيبه
واندحر مذموم واحلامه سحبها
ملك حزم وملك عزم وملك هيبه
ورجل سلم وحرب لا شبت حطبها
وفي يمناه السيف الأجرب ينغريبه
صاحب الوقفات ومطوع صعبها
يا ولي العهد ما بالقول ريبه
يا خلفها في سلفها يا جنبها
في وجودك كل مجدٍ نعتليبه
فوق هام السحب يا محقق طلبها
يا حكيم الرأي رايك نقتديبه
يا نظر كل العيون وياهديها
انجازاتك في وطنا نهتنيبه
والمستقبل اشمل واعظم وابها
انت هوماتك بعيدات وتعيبه
والاهداف السامية عقلك رغبها
صاحب الرؤية على غيره صعيبة
ابتكرها واعتمدها وانتخبها
والمراجل حطها الله من نصيبه
موهبه والرب لمحمد وهبها
واقتصادٍ تحتميه وترتهييه
هو شرايين البلاد وهو عصبها
والمسافات البعيده والقريبة
انت من حط العلامات وحسبها
والمهمات الخطيره والعصيبة
انت من هدي الصعيبات وغلبها
يا وزير الجيش دايم تحتفيبه
يا فخر كل الأشاوس ياطربها
الجند المملكه رتل واتيبه
نارهم صبت على الطاغي لهبها
كم عديم بالوغى يدحر حريبه
وكم شجاعٍ للوطن روحه جلبها
سيدي والدار مجدٍ نحتميبه
من غلاها رملها يشبه ذهبها
كلنا فدوه لدولتنا الحبيبه
ما نتهاون في نداك وفي طلبها
عزنا بالله نسود ونستويبه
ثم عز اللي نحارب من حربها
ومن تنكر للوطن ربه حسيبه
امه اللي عزته ينكر تعبها
ومن يخون بلادنا وش نحتريبه
عقرب الطين اللعين اقطع ذنبها
ولا نتسمع للتصاريح المريبه
من صغيرٍ نيته معنا قلبها
كل مجده كل عزه كل طيبه
ضدنا كل الحماقات ارتكبها
ما سألنا عن غثاه وعن نحيبه
كأس غدره يوم جهزها شربها
بالخداع يودي العلم ويجيبه
والمشاكل كلها مصدر سببها
يا سليل المجد والساس العريبه
يعربي الأصل من صفوة عربها
الرياضه كل دعمك تغتنيبه
انديتها كلها مع منتخبها
بشر اهل الهجن ما للهجن غيبه
عن ميادين السباق وعن صخبها
يا حفيد اللي على دور النجيبه
مثل ابو تركي قليل اللي ركبها
کم سراله ليلةٍ ما ينسريبه
مع بطون شعابها ياما شعبها
جا يرد الدار ماراحت ذهيبة
شامت وعافت سواه اللي خطبها
مهرته صوب العلا عجلٍ هذيبه
اعتلاها وصوب عدوانه هذبها
مع رجالٍ لازهم كلٍ يجيبه
سم يا عبدالعزيز القوم نبها
الجزيره قبل ابو تركي غضيبه
ويوم جاها صانها وابعد رعبها
شرها كانت تبيع وتشتريبه
وبالهدى والعدل والحكمة قضبها
يا الله انك ترحمه يا الله تثيبه
والملوك اللي على العليا نجبها
جعل مسكنهم بجناتٍ رحيبه
دارجات انهارها داني رطبها
تمت وصلوا على من نهتديبه
عدة أعداد النجوم ومن رقبها