تباشرنا بيوم العز في فجرٍ سناه يلوح

برجل غيّر التاريخ وحدد يوم ميلاده

يقول إنها لنا دار ٍ وحنا للديار صروح

وهذا واحد وتسعين عام تصدح أمجاده

- هيله آل سليم (شواهق نجد)

* * *

هذا يومٍ على الشعب السعودي مثل نبض الروح

وله حب القلوب يزيد فالاعماق بزياده

غلاه اللي يغذينا ولاءٍ فوق كل البوح

رجاله من وراه وترفع الرايات باعياده

- (فاطمة ناصر)

* * *

درسنا حبنا من سارعي للمجد حرف ولوح

ومع رؤية ابو سلمان ميثاقه وميعاده

ونبقى له على مرّ الزمن روح ووفا وطموح

صناديدٍ على حدوده تباهى بمجد اجداده

- (هند الفهيد)

* * *

بذلنا له نفوسٍ حبها لجل الثرى مشروح

على الحد الجنوبي ثابته والطاعه عباده

تغنينا تحت راية ملكنا والفخر مسموح

وهذي من قديم افعالنا والنا الوفا عاده

- (ام الفهد العتيبية)

* * *

وطن لولا تضاريس الخريطه ماعليه سفوح

قمم صاغت مـن مزون المهابه تاج و قلاده

هو اجمل قصة حيه لها صدر الورق مفتوح

كتبها عاشقٍ تسقي عروقه فاخر مْداده

- (اسما البراهيم)

* * *

وطن شامخ ومن دونه دم الحر الابي مسفوح

وعلى وجه الوسيعه ينتشي لاهتز رعاده

نماريبه ومن حسنه تمايل له غصون الدوح

واسم عبد العزيز من الوفا ومن الفخر زاده

- (بروق بدويه)

* * *

وطنا مالنا غيره وطن ! لوّ النفوس تْروح

وطّنا معتلي ذروة.. سنام المجد وشْداده

«محبتنا حقيقية» نبرهنها ما هيب مْزوح

عسانا ما نبدّل غيره، ومانفقد أسياده

- (عيوف)

* * *

عسى عامك سعيد ورايتك فوق السحاب تلوح

تحت.. ظل المليك اللي ذراه يظلل بلاده

نحبك ونتفاخر بك وندعي والسماء مفتوح

عسى الله يجمع الشمل السعودي شعب وقياده

- (عيون المها)