سم وعلى خشمي وتامر ولبيه

كم فرّقت شملٍ ماهوب يتفرّق

لاقاله الّلي ماتهمّه وتعنيه

وعلّق بها الناخي وراح يتطرّق

ادعي لراعيها عسى الله يغنيه

عن فعله الّلي من رداه يتدرّق

يقولها في مجلسٍ عند ناخيه

ولا صار بلحاله تلفّت وبرّق

ماجوّده حملٍ ذبح من رجاء فيه

وخلاه من بعض الجموع يتسرّق

لو كل قلب يحس باللي حواليه

كان أكثر قلوب الرفاقه مخرّق

وأنا تعبت من الزمان وبلاويه

وغصن التعب باليأس في النفس ورّق

أشيل همٍ عاجزٍ عنه راعيه

ولا شافني بالهم غرّبت شرّق

وأصد عن شوفة عيون المشاريه

وأنا عيوني بالمشاريه غِرَّق

** **

- فهد بن محمد السياري